Mia cara madre,
sta pe trasí Natale,
e a stá luntano cchiù mme sape ammaro
comme vurria appiccia duje o tre biangale
comme vurría sentí nu zampugnaro!

A e ninne mieje facitele o presebbio
e a tavula mettite o piatto mio
facite, quann'è a sera d'a Vigilia
comme si mmiez'a vuje stesse pur'io

E nce ne costa lacreme st'America
a nuje Napulitane!
Pe nuje ca ce cchiagnimmo o cielo e Napule,
comm'è amaro stu ppane!

Mia cara madre,
che só, che só e denare?
Pe chi sse cchiagne a patria, num só niente!
mo tengo quacche dollaro, e mme pare
ca nun só stato maje tanto pezzente!

mme sonno tutt'e nnotte a casa mia
e d'e ccriature meje ne sento a voce
ma a vuje ve sonno comm'a na "Maria"
cu e spade m'pietto, n'nanz'ô figlio n'croce!

E nce ne costa lacreme st'America
a nuje Napulitane!
pe nuje ca ce cchiagnimmo o cielo e Napule,
comm'è amaro stu ppane!

mm'avite scritto
cch'Assuntulella cchiamma
chi ll'ha lassata e sta luntana ancora
che v'aggi'a dí? si e figlie vònno a mamma,
facítela turná cchella "signora"

Io no, nun torno... mme ne resto fore
e resto a faticá pe tuttuquante
I, cch'aggio perzo casa, patria e onore,
i só carne e maciello: só emigrante!

E nce ne costa lacreme st'America
a nuje Napulitane!
pe nuje ca ce cchiagnimmo o cielo e Napule,
comm'è amaro stu ppane!