Pytûmby jave opu'ã
Pe poniénteguio ou
Arai pytã ha hû
Yvytu renonderã
Otiri ha overa
Ndosovéi arasunu
Hesakã ha iñypytû
Ojopy ñande py'a

Otyky pokã pokã
Amandáu opororo
Sarambíko ojapo
Opaitéicha jahecha
Ipyi ha'e ho'a
Ikehágui ryguasu
Hatãnguere otutu
Ogaguýre ojeheka

Hopisãgui opoi
Okukúi naranja a
Pe yvýre ojeka
Hatykue isarambi

Ka'aguýre oñani
Kavaju ha'e vaka
Hi'ãháre oikepa
Omondýigui aratiri

Yvate jakavere
Ojeity ha opu'ã
Okañy iguejyha
Ndojuhúiri ñu mbyte

Pe jaíre operere
Piriríta ha ano
Ipyenda omondoho
Yvytu vai etaite

Pyhare hyapupa
Oguyguy ha osunu
Ha hasê pe yvytu
Ha'ete arapaha
Ñañandu porãveha
Nde py'a omongyhyje
Rejuhu nde rekove
Tahyimírehe ojoja

Hopisãgui opoi
Okukúi naranja a
Pe yvýre ojeka
Hatykue isarambi

Ka'aguýre oñani
Kavaju ha'e vaka
Hi'ãháre oikepa
Omondýigui aratiri